أسعار سيارات هافال والمراجعات والعروض في الإمارات

الصراحة، من أول ما شفت شكل السيارة شدّني. الواجهة الأمامية فيها شبك عريض بخطوط أفقية يعطي السيارة مظهر أعرض وهيبة أكثر، وتصميم كشافات الضباب على شكل حرف C يعطي لمسة رياضية. من الجانب، الخطوط مستقيمة وانسيابية، ومع وجود الرفارف البارزة والجنط 20 إنش بتصميمه الجميل، شكل السيارة يعطيك إحساس بالفخامة والحضور. وحتى بالخلف، الخطوط واضحة والتصميم فيه طابع رجولي مع فتحات العادم المزدوجة والتطعيمات الكروم. من الداخل، اللون البني المستخدم (اللي يسمونه “مونیکا براون”) أعطى إحساس راقٍ، مع لمسات كروم وحشوات خشبية تعطيك جو فاخر. الشاشة 9 إنش تشتغل بنظام "Flying Fish 2.0"، وتدعم الأوامر الصوتية للتحكم بالمكيف، النوافذ، الملاحة، الترفيه، وحتى المكالمات. سهلة الاستخدام وتستجيب بسرعة، وما حسيت فيها أي بطء. وبانوراما السقف الكبيرة تعطي إحساس رحابة وراحة داخلية ممتازة. المساحة؟ ممتازة. أنا طولي 177 سم، ولما أجلس قدّام، عندي تقريباً قبضة ونص فراغ فوق راسي. ولما أرجع للمقاعد الخلفية بنفس الإعدادات، عندي حوالي قبضة وحدة فوق الرأس، ومساحة الأرجل أكثر من قبضتين، والمقاعد نفسها مريحة. يعني من ناحية الرحابة، السيارة مريحة سواء للسواق أو الركاب. الأداء: السيارة تجي بمحرك 2.0 تيربو مع قير دبل كلتش 7 سرعات. لما تمشي فيها تحس أن فيها عزم ممتاز، الدعسة تستجيب بسرعة، وفيها "Push back" محترم. وفي وضعية السبورت، السيارة تعطيك طاقة فجأة، كأنها تبغي تنطلق أكثر، والأداء العام ممتاز بالنسبة للفئة والسعر. لكن مثل أي سيارة، فيها شوية ملاحظات: الراحة على الطرق غير المستوية: التعليق شوي قاسي، وخصوصًا في المطبات أو الحفر، الركاب في الخلف ممكن يحسون بعدم راحة. العزل الصوتي: على السرعات العالية، تلاحظ صوت الهواء والكفرات داخل المقصورة، وهذا يخرب شوي من تجربة الراحة. استهلاك البنزين: في المدينة توصل فوق 10 لتر لكل 100 كم، وإذا شغلت المكيف يزيد أكثر. أما على الخط، فتنزل شوي لـ9 لتر تقريباً. هافال H7 تقدم شكل قوي، مواصفات فخمة، أنظمة أمان جيدة، وسعر منافس خصوصاً بعد الخصم. والمميز فيها إنها زادت بالمواصفات من غير ما يرفعون السعر. باختصار، SUV محترمة وتستاهل.

أنا كثير أطلع بر وسفاري، فكان أهم شي عندي إني آخذ سيارة تتحمل وتكون فعلاً جاهزة للطرق الوعرة، وبصراحة هافال H9 أثبتت لي إنها قدّها وقدود. السيارة تمشي في الدروب الصعبة بدون ما تحتاج أي تعديل، ومع إنها وكالة، إلا إنها تتعامل مع المطبات والحفر بكل سهولة. الكراسي مريحة جداً، والمساحة ممتازة، ونظام التعليق ناعم يخليك مرتاح حتى في الطرق الترابية أو غير المعبدة. يوم سألت عن سعر السيارة في السوق بعد فترة استخدام، انصدمت إنها ما نزلت كثير، فعلاً سيارة تحافظ على قيمتها. الداخلية فيها شوية ملاحظات، ما تعكس فخامة السيارة من بره، التصميم بسيط وشوي قديم، والمادة المستخدمة تعتبر متوسطة. تمنيت يكون فيها طابع أكثر حداثة. حوالين الجير مافي مساحات تخزين كافية، الأزرار كثيرة ومزدحمة شوي، فما عندك مكان واضح تحط فيه محفظتك أو تلفونك، أنا شخصياً أحطهم على كرسي الراكب. حجم السيارة كبير، وهذا يسبب شوية ضغط داخل المدينة، أحياناً ألاقي موقف ممتاز بس ما أقدر أدخل فيه، خصوصاً لو الشوارع ضيقة. لكن لما تطلع بر أو تسافر مسافات طويلة، تكتشف ليش حجمها ميزة مش عيب. السيارة واسعة جداً من الداخل، سواء الركاب أو مساحة الشنطة. السطر الثاني مريح جداً، حتى الكبار يقدرون يمدون رجولهم ويرتاحون، والشنطة تكفي كل العفش، بس تحتاج شوي جهد لأن مستواها مرتفع ورفع الأغراض يتعب. أما من ناحية الأداء، فكنت متوقع إنه بيكون عادي، خصوصاً إني جربت محرك 2.0 تيربو مع قير 8 نمر قبل كذا، لكن هنا الوضع اختلف. تسارع السيارة كان سلس ومفاجئ، والقيادة ناعمة، وتحس إن العزم متوفر من بدري، ما تحس إنها سيارة ثقيلة أو كسولة، حتى لما تكون محمّلة. الصوت داخل السيارة في الخط جداً هادئ، العزل ممتاز، تقدر تتكلم بصوتك الطبيعي وما تحتاج ترفع صوتك، وهذا بالنسبة لي شي أساسي. نظام الدفع الرباعي ذكي جداً، فيه دبل، دفلوك أمامي وخلفي، مع شاصي فعلي غير حمّال، والسيارة مبنية من الأساس لتكون قوية في البر. واضح إن هافال اشتغلت بجد في بناء السيارة هذي لتناسب المغامرين واللي يحبون يطلعون للبر، وأشوف إنها تتفوق بوضوح على منافسين بنفس السعر، مثل الجيتور مثلاً، اللي يوصل سعره 20 ألف وهو أصغر وأقل قدرة في البر. بكل صراحة، لو تبغي سيارة شكلها قوي، أداءها ثابت، مريحة في السفر، وقادرة فعلاً تطلعك من أي ورطة في البر، هافال H9 خيار ممتاز. ومهما كانت عندها ملاحظات بسيطة في الديكور، تظل سيارة تستاهل كل درهم تدفعه فيها.

كنت أملك سيارة هافال H2s ، واستهلاكها للبنزين عالي، فقررت أغيّرها. رحت أشوف سيارات مثل "دوق"، "كلاسيك"، "ستارلايت L"، و"تيجو 9". معظمهم كانوا فوق الميزانية، خصوصاً سيارات هافال وقتها ما كان عليها عروض قوية. بداية 2025، شفت عروض حلوة على هافال H6 كلاسيك و"دوق". رحت وكالة هافال في دبي وسألنا عن الأسعار، حسبوا السعر مع خصم المصنع واستبدال السيارة. ترددت شوي، بس بعدين عرفت إن الدعم في أبوظبي أعلى، فرحنا هناك وشافينا العرض على H6 كلاسيك و"دوق" مرة ثانية. بصراحة، "دوق" كانت ممتازة من الداخل، بس تصميمها الخارجي ما عجبني، وفيها صوت بسيط في الباب. اخترت H6 كلاسيك لأن شكلها وسعرها مناسبين. خذيت معها باب خلفي كهربائي، دواسات كهربائية، وفرش أرضية 360 درجة – كلهم مجاناً من الوكالة. السيارة مريحة وواسعة، حتى أدوات الصيد صارت تركب كلها في الشنطة. الأداء ممتاز، والسيارة تستجيب بسرعة. التوجيه دقيق جداً بدون أي فراغ في الدركسون. استهلاك البنزين في الخطوط السريعة تمشي على 6 ونص تقريباً، لكن في الطرق الداخلية توصل 9 وأكثر. مقبول جداً بالنسبة لي. يمكن الأسعار تنزل بعدين، لكن رأيي اشتر بدري واستمتع، لا تتردد. وبإذن الله أشارك تجربتي القادمة مع الاستخدام واستهلاك البنزين.

إيه عوامل الأمان في هافال H9؟ وهل تعتبر كافية ولا محتاجة تحسين؟

كيف راحة هافال H9 في الرحلات الطويلة؟ هل فيها عزل وراحة كويسة؟